Astana International Exchange (AIX) 2017 жылы Орталық Азияда және одан тыс жерлерде капиталдың сенімді нарықтарын дамыту мақсатында «Астана» халықаралық қаржы орталығының (АХҚО) негізгі элементі ретінде құрылды.
AIX тәуелсіз реттеуші – Қаржылық қызметтер көрсетуді реттеу комитетімен (AFSA) бірлесіп ағылшын құқығы қағидаттарына негізделген АХҚО-ның нормативтік-құқықтық ортасында жұмыс істейді. Біз сенімді және ашық сауда инфрақұрылымын құруға ықпал ете отырып, бизнеске де, инвесторларға да тиімді инновациялық өнімдер мен қызметтерді ұсынамыз.
Біздің экожүйе
AIX 60-тан астам жергілікті және халықаралық сауда мүшелері мен AIX CSD мүшелерінің кең экожүйесі қолданатын T+2 есептесу жүйесі бар заманауи технологиялық платформада жұмыс істейді. Nasdaq озық сауда платформасының және АХҚО, Шанхай қор биржасы, Жібек Жолы қоры және NASDAQ сияқты жаһандық қаржы институттарының қолдауының арқасында біз үздіксіз және қауіпсіз сауданы қамтамасыз етеміз. AIX 2018 жылдың қараша айында іске қосылғаннан бері біз сауда-саттықтан клирингтік операцияларға және бағалы қағаздарды тіркеуге дейінгі толық бизнес циклды ұсынатын әлемдік деңгейдегі биржаны қысқа мерзімде құра алдық.
Біз нені ұсынамыз
- Жергілікті және халықаралық нарықтарға қолжетімділік: Біз жаһандық инвесторлар мен қазақстандық бизнесті байланыстырамыз, сондай-ақ жергілікті және халықаралық эмитенттерге Қазақстанда да, әлемдік нарықтарда да капиталды тиімді тартуға арналған платформа ұсынамыз.
- Активтердің кең спектрі: AIX акцияларға, кірісі бекітілген бағалы қағаздарға, құрылымдық өнімдерге және қорларға маманданған. Біз мемлекеттік активтерді жекешелендіру бағдарламасы аясында Үкімет бастамашылық ететін IPO-ларда белсенді рөл атқарамыз және нарықта орналастыруды ынталандыру үшін жеке сектормен тығыз жұмыс істейміз.
- Халықаралық байланыстар: Біз AIX-те листингке ие болғысы келетін және капиталды тарту үшін біздің юрисдикциямызды зерттейтін шетелдік компаниялармен байланыс орнатамыз. Біздің биржа әлемдік нарықтарға шығуға ұмтылатын эмитенттердің листингі үшін таңдаулы алаңға айналуда.
Біздің миссиямыз
Біздің миссиямыз – бизнес үшін де, инвесторлар үшін де инновациялық қызметтерді ұсына отырып, Орталық Азияда және одан тыс жерлерде сенімді және өтімді капитал нарықтарын құру.
Біздің құндылықтарымыз
- Инновациялар мен өзгерістер: біз өзгерістерді құптаймыз, инновацияларды енгіземіз және тәжірибе жасаудан қорықпаймыз. Біз әрқашан алда болу үшін озық технологияларды енгізуге тырысамыз.
- Кәсіпқойлық және қауіпсіздік: AIX ең үздік халықаралық тәжірибелер негізінде нарықтар мен оның қатысушылары үшін сенімді әрі қауіпсіз шешімдерді құруға бағытталған жоғары сапалы қызметтерді ұсынады.
- Бір команда: біз ортақ мақсаттарға жету үшін бір-бірімізді өзара құрметтейтін және қолдайтын біртұтас команда ретінде жұмыс істейміз.
Капиталды тарту үшін қолайлы жағдайлар
AIX шетелдік капиталға қолжетімділікті және эмитенттер үшін де, инвесторлар үшін де қолайлы ортаны қамтамасыз ете отырып, Қазақстан мен Орталық Азиядағы бизнес үшін кең мүмкіндіктер ұсынады. «Астана» халықаралық қаржы орталығының (АХҚО) бөлігі бола отырып, AIX халықаралық стандарттарға сәйкес келетін қолайлы жағдайларды қамтамасыз етеді. Ұлыбританияның салық және кеден органдары тарапынан «танылған қор биржасы» мәртебесіне ие бола отырып, AIX Ұлыбританияның зейнетақы қорларына және басқа инвесторларға сауда-саттыққа қатысуға мүмкіндік береді, сонымен қатар FTSE Frontier Index Series талаптарына сәйкес келетін алаң ретінде танылады.
Реттеу
AIX ағылшын құқығы қағидаттарына негізделген реттеу режимінде жұмыс істейді. АХҚО Қаржылық қызметтер көрсетуді реттеу жөніндегі комитеті (AFSA) тәуекелдерді бағалауға негізделген икемді тәсілді қолдана отырып, қадағалауды жүзеге асырады. AIX қағидалары қауіпсіз әрі сенімді сауда ортасын қамтамасыз ете отырып, Ұлыбританияның листинг басқармасы (UKLA) және Дубай халықаралық қаржы орталығы (DIFC) сияқты реттеуші органдардың озық тәжірибесін ескереді.
Нарық қатысушылары үшін артықшылықтар
- Эмитенттер үшін: AIX компанияларға сәтті орналастыру үшін қажетті қолдауды қамтамасыз ете отырып, листинг пен кросс-листингтің жылдам әрі қарапайым рәсімдерін ұсынады.
- Инвесторлар үшін: AIX бағалы қағаздар бойынша капитал өсімін салықтан босату, жеке және заңды тұлғаларға дивидендтер мен купондық төлемдерді салықтан босату сияқты салықтық артықшылықтар береді.
- Брокерлер үшін: тану процесі арқылы АХҚО лицензиясын алу қажеттілігінсіз AIX-те сауда жасауға болады.
Жоғары өтімділік
AIX 50-ге жуық, оның жартысынан көбі шетелдік брокерлік компания қатысатын өтімді нарықты қалыптастыруда. Негізгі саудаланатын бағалы қағаздардың өтімділігін арттыру үшін маркет-мейкерлер тағайындалады.
Мультивалюталық сауда-саттық
AIX қаржы құралдарын кез-келген валютада шығарылуын қолдайды, бұл ретте мультивалюталық сауда және есеп айырысу қаржы құралының валютасына қарамастан мүмкін болады.
Қауіпсіздіктің озық технологиялары
AIX Amazon Web Services (AWS) базасындағы бұлттық сауда платформасы және ақпараттық, киберқауіпсіздіктің ISO 27001, ISO 27032, ISO 27018 және ISO 27017 сияқты жаһандық танылған сертификаттары арқылы қауіпсіздіктің жоғары деңгейін қамтамасыз етеді.